其實可唔可以唔好再亂急call三罷？
大家都應該明白罷一日其實係作用不大（主要作用係多一日...

其實可唔可以唔好再亂急call三罷？
大家都應該明白罷一日其實係作用不大（主要作用係多一日多啲人出嚟抗爭）
但要長期罷，對好多人嚟講都成本好大
就算你又鬧又氹，講一百萬次「前線食子彈，點解你連罷工都唔肯」，佢哋都唔會想付出呢個成本（而且有啲人真係手停口停，件事對佢哋嚟講係「前線食子彈，點解你連餓死都唔肯」）
最後往往就係得啲已經付出咗好多嘅人同埋一堆良心小店罷，令自己人生計更加困難

喺呼籲三罷前，理應先做下民意調查，睇下有幾多人肯罷、肯罷嘅人本身從事咩職業、職場上司及同事對罷工取態etc.，評估下最後出嚟效果如何
而且要研究下有冇足夠資源去支撐整場罷工，有冇辦法成立一啲組織去保障參與罷工嘅手足（其實冇工會支援，已經好難成功）

就算香港事態幾危急，民眾抗爭決心不足同力量不足都唔係呢刻就可以改變嘅事，亦正因事態危急，每次想大規模動員就更需要細心籌劃，而非求其嗌「文宣組做嘢」就算，否則只會白白消耗民氣
有啲長期出錢出力嘅手足，已經捉襟見肘（有啲已經冇咗份工，靠兼職維生），文宣一call三罷，佢哋又唔會忍心唔響應，但如果失敗咗又只會令佢哋生活更困難，佢哋唔係僱傭兵，係冇任何經濟支援㗎
而且呢場抗爭用到嘅錢（如：物資、律師費）好多都係由一班「中產和理非」支撐， 要佢哋都長期罷工，係咪真係會更容易達至抗爭勝利？
如果三罷唔可行，就唯有嘗試其他方法，而唔係貿貿然推晒堆最熱心嘅手足失業，再發晦氣鬧晒唔肯罷工嘅人死港豬就算

p.s.推一推呢個罷工民調：http://bit.ly/2nWkSyo　大家可以send埋畀同事填下

---